Kryeministri Edi Rama ka publikuar sot një mesazh të gjatë në rrjetet sociale, ku shprehet “shumë i nderuar” nga një ftesë personale që, sipas tij, i është bërë nga ish-presidenti amerikan Donald Trump për të përfaqësuar Shqipërinë në një strukturë të re ndërkombëtare të quajtur “Bordi i Paqes”.
Rama deklaron se Shqipëria është ftuar si anëtare themeluese, duke e cilësuar këtë si një tjetër arritje ndërkombëtare të vendit në vetëm pak vite. Sipas tij, ky është një moment që tregon respektin global që ka fituar Shqipëria dhe forcimin e partneritetit strategjik me SHBA.
“Nuk mund të jem më krenar për Shqipërinë, për gjithçka kemi arritur dhe për mënyrën se si vendi është kthyer në një Shqipëri më të respektuar se kurrë,” shkruan Rama, duke theksuar se ftesa e Trump është një vlerësim i posaçëm për rolin e Shqipërisë në arenën ndërkombëtare.
Ai shton se do të jetë pjesë e këtij bordi të krijuar dhe të kryesuar nga vetë Trump, me të cilin do të punojë për çështje që lidhen me paqen globale.
Rama e mbyll reagimin e tij me mesazhin:
“Thank you Mr. President. God bless Albania and the United States.”