Gjykata e Posaçme ka dhënë sot një nga vendimet më të diskutueshme të viteve të fundit për vrasjen tronditëse të ish-policit Santiago Malko. Në një proces të gjatë, të mbushur me dëshmi, përgjime, pretendime dhe akuza të rënda, GJKKO vendosi të dënojë Leonard Dukën me 30 vite burg. Por ajo që ka ngritur më shumë zhurmë është fakti se vëllai i tij, Erlis Duka, u shpall i pafajshëm dhe u largua nga akuza si i “pastruar” nga çdo dyshim.
Një vendim që ka hapur shumë gojë: Si ka mundësi? Çfarë peshoi Gjykata? Kush gaboi – SPAK apo hetimi?
Kontrasti i madh: 30 vite për njërin, pafajësi totale për tjetrin
Ndërsa për Leonard Dukën u konfirmuan akuzat e “Vrasjes me Paramendim”, “Armëmbajtjes pa leje” dhe “Trafik Narkotikësh” në kuadër të një grupi të strukturuar kriminal, për Erlis Dukën gjykata jo vetëm dha pafajësi, por edhe hoqi çdo masë sigurie për të gjitha akuzat e hapura.
Ky vendim bie ndesh me kërkesën e SPAK-ut, i cili vetëm pak ditë më parë kërkonte 25 vite burg për Erlisin, duke deklaruar se provat e lidhin me grupin kriminal.
Publiku dhe opinioni janë lënë pa përgjigje:
Si ndryshoi kaq drastik vlerësimi? Si një dosje e tillë e rëndë përfundon me një “i pafajshëm” të plotë?
Momente dramatike në sallë: nëna e Malkos shpërthen
Në seancën e 19 janarit, nëna e Santiago Malkos tha me zë të lartë se Leonard Duka ia kishte vrarë djalin, duke akuzuar edhe vëllain e tij.
“Dua dënim me vdekje për këtë,” u shpreh ajo, mes tensioneve të forta.
Sot, një pjesë e akuzave të saj mbetet pa përgjigje, për shkak të vendimit për Erlisin.
Mbrojtja rrëzon provat, GJKKO u bind?
Avokatja e Leonard Dukës deklaroi se dosja e SPAK-ut ishte e bazuar te “deduksione mediatike” dhe jo te prova konkrete, duke vënë në dyshim edhe ligjshmërinë e përgjimeve të SKY ECC.
Dyshimet e ngritura nga mbrojtja duket se kanë peshuar mjaftueshëm për t’i shpëtuar vëllait nga akuzat, duke lënë të kuptohet se një pjesë e hetimit mund të ketë ‘rënë’ në gjykatë.
Dënime të rënda për pjesën tjetër të grupit
GJKKO dënoi me 25 vite burg Fatmir Hysenin, Aleksandër Manxhakun, Oltjon Logën dhe Dritan Agajn, duke i konsideruar bashkëpunëtorë në vrasjen e Malkos.
Por fakti që disa u dënuan dhe njëri prej vëllezërve u shpall i pastër nga çdo akuzë e bën edhe më të fortë pyetjen që sot po bëhet publikisht:
Si ka mundësi që brenda të njëjtës dosje, njëri shpallet organizator, të tjerët fajtorë, ndërsa vëllai “i pafajshëm”? Çfarë nuk shkoi në hetim apo në provat e SPAK-ut?
Një vendim që pritet të jetë në qendër të debatit publik në ditët në vijim.